Сочинение на тему Роль периодических изданий в развитии языка

Меним адым Эдем, мен Башмакъ коюнде яшайым. Мектебимиз къомшу коюнде ерлешкен. Эр кунь мектеп автобусы бизлерни алып кете ве алып келе. Куньлернинъ биринде, мектепке ёл алгъанда, чёлюмизге бакътым да, бирден, «Къартбитам, къартбабам бу ерлерде яшагъан, оськенлер», - деген фикирлер башыма кельди. Ве рахметли къартбитамны хатырлавлары акъылыма тюшти. «Балам, бизлер Къырымда яшагъанда мектепте дерслер тек къырымтатар тилинде алып барыла эди, бизлер достларымызнен, сыныфдашларымызнен тек ана тилинде лаф эте эдик», - дей эди. «Эгер сизлер, эвлятларым, меним, ана-бабанъызны, халкъымызны хатырлавларыны сакълап къалмакъ истесенъиз, ана тилимизге, Ватанымызгъа олгъан севгинъизни ич бир вакъыт унутманъыз», - деп, насиат берди. Бу сёзлер тосат-тосат акъылыма тюше.
Мектептен къайткъан сонъ, аман долаптан къырымтатар тилинде чыкъкъан «Арманчыкъ» меджмуасыны алдым да, икяелерни, масалларны окъуп башладым. Битам эр Йылбаш бейрамында нарат тюбюне татлы бахшыш азырлай, къартбабам исе торунларына «Арманчыкъ» меджмуасына абуне багъышлай. Мен бу меракълы ве чешит ренкли меджмуанынъ эр бир саныны сабырсызлыкънен беклейим. Оны биринджи саифеден сонъунадже окъуйым. Бизим ана тилимизни инкишафында, ана тилинде лаф этмеген яда зайыф лаф эткен балаларгъа биринджи ярдымджы ола. Чюнки бу меджмуада унутылгъан бала оюнларыны тапмакъ мумкюн, бу меджмуада судоку, булмачалар тилимизни лугъатыны арттырмагъа ярдым эте. «Арманчыкъ»нынъ эр санынынъ сонъки саифесинде исе чешит мевзуда лугъат сезлер тапмакъ мумкюн. «Арманчыкъ» ана тилимизни инкишафында пек керекли, файдалы, буюк роль ойнагъан меджмуалардан биридир. Эгер эр бир къырымтатар къорантасы бойле меджмуа, газеталаргъа абуне олып, оларны окъуса бизим тилимизни келеджеги парлакъ олур.

15