Статья (на мокшанском языке) Сембе пингонь кувалмос эряй мялямсь

Сембе пингонь кувалмос эряй мялямсь
Октябрьсь–тя тяфтама сёксень ковсь, мъзярда эряфкшу ломаттненди шарфневи сяда оцю мяль. Велень культурань тевонь вятихне, школаса тонафнихне тонафтыснон мархта няфнихть тейст концерт, лезнихть тевса. Синь тернесазь васьфтемас, пуромксс. Тяфта и Сире Теризморга велень школаса иттне васьфнесть кельгома сире учительснон, педагогическяй трудонь ветераттнень мархта: Гераськина Тамара Васильевнань, Чевтайкина Екатерина Петровнань, Чудаева Мария Яковлевнань, Пивкина Татьяна Николаевнань, Куданкина Анастасия Семёновнань. Синь сембе вийснон максозь идень тонафтомати, эряфонь киса лямбе седи ломанькс касфтомати, Родинань кельгомати и, къда эрявксты, шачема ширень араламати.
Васьфтемати, кона лемтьфоль «Сембе пингонь кувалмос эряй мялямсь», тертьфтольхть нинге оцю конакт республикаста: Мария Семёновна Белых–культурно-массовай тевонь вятемаса комиссиять председателец, Лазарев Василий Владимирович - республиканскяй ветеранонь советонь член, «Мокшень правда» газетать шеф-редактороц, Честнов Геннадий Андреевич– райононь ветераттнень председательсна.
Пуромксса корхтамась мольфтевсь шачема-касома масторти кельгомать колга, сонь вии цёранзон-героензон колга, конат тиезь семботь, штоба масторть лангса улель валда и сетьме менельсь, штоба масторлангсонк вестенге афоль уле война.
Семботь макссы тейнек тядянь-алянь масторсь: лямбе тядянь кядьса паньф калацять, эшиень-лихтибрянянь кельме и ару веднять, перьфпяльдень мазышить, кона салазь саласы сельмованфть… Аньцек эсь прянь аралама шачем-касом масторсь аф машты. Сяс шачема ширеть араламац арась васенце тевокс касы поколенияти - сянди, кие касфты сёра, кие сими веденц, кие кельгсы мазышинц. Честь и слава сянди, кие максозе и макссесы эсь долгонц Родинать араламаса. Катк мялямсонк сембе пингонь кувалмос илядыхть лятфнематне Родинаньконь стирензон и цёранзон колга, конат тюрсть Великай Отечественнай войнать пингста, конат эряфснон ашезь ужяльде и пряснон няфтезь геройкс Афганистанца. Од солдаттне, офицерхне, омоновецне и спецназовецне, ГИБДД-нь, ППС-нь, уголовнай розысконь сотрудникне эряфонь апак ужялтть тюрсть бандиттнень каршес Севернай Кавказса. Кассь од ломанень сельмованфсь аф киза коряс, кассь ялгаксшить питнец.
Пуромксса эсь алянц войнань подвигонзон колга, велеряйхнень-геройхнень войнань киснон-янцнон колга азондсь Нина Николаевна Черновась, рузонь кялень и литературань тонафтысь. Лятфтазень велеряйхнень-афганскяй войнань участникнень: Ямашкин Юрий Николаевич, Раков Андрей Иванович, Глухов Семён Иванович, Маркин Иван Николаевич, Аверяскин Василий Васильевич, Клишин Алексей Алексеевич, Шилкин Александр Васильевич, Макаров Семён Васильевич, Ямашкин Юрий Иванович, Вишняков Пётр Иванович, Ямашкин Иван Фёдорович.
Лятфтазень велеряйхнень– чеченскяй войнань участникнень, конат Родинать приказонц коряс сявозь кядезост оружиять: Пивкин Александр Александрович, Атеняев Александр Николаевич, Тремаскин Евгений Фёдорович, Качанов Виктор Викторович.
Карксэземга сюконятама тинь инголент, солдатт! Сюконятама сятненди, кит сембе пингс идядсть Афганистану и Севернай Кавказу, кит ашесть мърда эсь эряма уженязост.
И мъзяра ба пингта афоль ёта, а ся шитне и ветне сембе пингс илядыхть седиса, сяс мес синь панфт ялгань верса и ливозьса, тядянь сельмоведьса.
Мария Семёновна азондозе эсь эряфстонза толу и стака пинкнень. Иттнень седиснон токазень азксонза Великай Отечественнай войнань пингонь сталмотнень колга, вачашить, нужаса эрямась-касомась. Но сякокс, кода маштсть, стане и лездсть фронтти.

Василий Владимирович, отставкаса внутренняй службань подполковниксь, лама азондсь, няфтсь видеоматериал антитеррористическяй темать коряс. 12 кизонь кувалмоса теенза ветексть савсь улемс командировкаса Чеченскяй Республикать территорияса, няемс ся сталмотнень, толу китнень, од солдаттнень и офицерхнень, конат тиендезь, пяшкотькшнезь приказснон, аф азомшка вий путнесть врагть каршес тюремста, няфтемок пряснон геройкс. «Сембодонга стакась монь тевсон ульсь ся, мъзярда улень кочкаф командать ёткса, кона усксь «груз-200»,-корхтась Василий Владимирович,-тейнек савсь ваномс тядянь ризфта пяшксе сельмотненди, конатненди ускфтольхть лазксса идьсна. Киндивок тяфтама афолень арьсе эсь эряфсонза. Тя пяк стака…»
Мялямсь синь колгаст эряй сембе пингонь кувалмос ялгань, тядянь-алянь седиса, маластонь ломанень седиса. Мялямсь синь колгаст эряй ся пингти, мъзярс минь синь лятфнесаськ, мъзярс минь корхтатама колгаст, мъзярс минь сёрматтама колгаст.
Ванфтода фкя-фкянь, ванфтость ялгаксшить. Ванфтость масторть лангса мирть. Ванфтость сенем менельть вельхкссонт. Катк эряфса кармай аньцек ялгаксши, шинь лямбе, а менельсь шобдалготкшни аньцек лямбе и сетьме пиземнянди.
Василий Владимирович лувозень эсь ладяф стихонзон, конат лемтьфт эсь шачема уженянцты - Ежовка велети и азондыхть маластонь ломаттнень, ялгаксшить колга, шабакспингть колга.
Геннадий Андреевич азсь иттненди, тонафтыхненди, педагогическяй трудонь ветераттненди лямбе седи ваксстонь валхт, кеме шумбраши и содамошит.
Эсь пяльдест школаса тонафнихне и тонафтыхне няфтсть музыкально-литературнай композиция, коса седи ваксста азонфтольхть стихт и морафтольхть морот.
Василий Владимирович алякс люпштазень школань цёратнень кядьснон и мярьгсь: «Няйса и маряса седиезень мархта – Теризморгаса цёратнень лафтусна кемот, сяс и надиян, што ули кинди араламс Родинать тя мокшень велеста.»
Сокорова Л.А.,
мокшень кялень и литературань тонафты