Ата-аналар арасында?ы «Ж?ректен-ж?рекке»- атты тренинг.

Новоишим қазақ орта мектебі
Ата-аналар арасындағы тренинг.
Өткізген: Кабдуллина А. М
2013-2014 оқу жылы
«Жүректен-жүрекке»- атты 2а, 2ә сынып ата-аналар арасындағы тренинг.
Мақсаты: Ата – аналар арасында жағымды қарым – қатынас орнату, сыйластықты арттыру, отбасында балаға жақсы тәрбие беруіне ықпал ету, өзін өмірдің бір бөлшегі ретінде сезіндіру, өзін және өзгені бағалай білуге көмектесу.  Әр отбасының бала тәрбиесіне белсене қатысуының маңызын арттыру. Баланың мейірімді сыпайы әдеттерді бойына сіңіріп өсу жолдарын ата-аналармен бірлесе қарастыру.
Өту әдісі: Сұрақ- жауап, өз ойларын ортаға салу, өмірмен байланыстыру, ойын, шығармашылық жұмыстар.
Көрнекілігі: Түсті бояулар, А-4 қағаздары, ватман, слайдтар.
Тренинг ережесі: Сенімділік. Сыйластық. Жақын араласу
«Шаттық шеңбері»
1. «Маржан» ойыны (шеңберге тұрып, өз есімдерін айтып танысу)
Сәлемдесу- бір күнгі танысыңа қырық күн сәлем дегендей біз бүгін бір – бірімізбен дәстүрден тыс амандасу түрлерін жасаймыз.
1 нұсқа. Алақанымыздың ішін және сыртын тигізіп бір – бірімізге күлімсірей қарайық
2 нұсқа. Бір – бірімізге маңдайларымызды тигізіп сәлемдесеміз.
3 нұсқа. Оң және сол жақ иықтарыңызды тигізіп сәлемдесу. Сәлемдесу кезінде қандай әсерде болдыңыздар?
2. Топқа бөліну (түстер бойынша)
1. Балауса                              2. Арай                               3. Шаттық
Мұғалім: Әрбір ата-ана өмірге бала әкелгеннен кейін оған тәлім тәрбие беретіні белгілі. Бала тек қана отбасы тәрбиесін алып қана қоймайды. Ол қоршаған ортаның тәрбиесін алатыны сөзсіз.
Бала дүниеге келгенде таза ақ парақ секілді, пәк болып келеді. Сол пәк сәбиге 3түрлі адамның мінезі беріледі:
Ата-анасынан, себебі бала ес білген шаққа дейін, бар нәрсені өз отбасынан табады.
Ұстазынан үлгі алады, өйткені алғаш мектеп табалдырығын аттағанда қолына алғаш Әліппені ұстатып, өмір жолына алғаш жол салатын ұстазы.
Достарынан, өйткені ол бос уақытының көбін достарымен өткізеді.
Осы үш адамның бойындағы мінез- құлықтарды екшелей келіп, олардың ішіндегі өзіне ұнайтын жақтарын алады екен.
3. Байлаулы бала (тренинг):
Бір ата-ана ортаға шығады. Төмендегідей сұрақтар қойылады.
Сіз балаңызбен көл жағасына бардыңыз. Балаңыз суға қызыққаны соншалық суға қарай жүгіріп кетті. Сіз қалай тоқтатасыз? (аяғы байланады)
Қарасаңыз балаңыз адамдардың тастап кеткен темекінің тұқылын жинап алып, сонымен ойнап отыр. Сіздің әрекетіңіз? (қолы байланады)
Жұмыстан шаршап келсеңіз бала теледидардан атыс-шабыс, бір сөзбен айтқанда өз деңгейіне келмейтін кино көріп отыр. Сіздің әрекетіңіз? (көзі байланады)
Балаңыз сізге басқа ұлттың қызын ұнатты. Бірақ сіздің қалауыңыз ол емес еді. Сіздің әрекетіңіз? (кеудесі байланады)
Балаңыз досымен келіспей қалды да, жаман сөздермен сыбағасын берді. Сіздің айтар сөзіңіз? (аузы байланады)
Міне, баламыз қандай күйге түсті, құрметті ата-ана. Мұндай күйге түспес үшін баламызға неге болмайтынын, «өйткені» сөзін қолдана отырып түсіндіруіміз керек. Сонда ғана сіз бала тәрбиесінде мақсатыңызға жете аласыз. Ендеше, сізден, бізден және өз жолдастарының жақсы жақтарын ала білген біздің балаларымыздың бойында адами қасиеттердің көп болары сөзсіз.
Болашақта балаңызды қандай адам ретінде елестететіндерін стикерге жазып «Достық ағашына» іледі. (баяу музыка ойналады)
4. Әр топ «Бақытты балалық шақ»тақырыбына сурет салу, қорғау.
5. «Сиқырлы қоржын» ойлауға арналған сұрақтар. Әр адам қоржыннан аяқталмаған сөйлемі бар үлестірмелер алады да өз сөздерімен сөйлемді аяқтайды.
1. Ең үлкен қорқыныш бұл – ....
2. Мен мынадай адамдарға сенбеймін.....
3. Мен ренжимін, егер....
4. Мен қуаныштымын, себебі.....
5. Баланы үнемі қолдап отырса.....
6. Мен үшін бақыт деген.....
7. Отбасының қорғаны кім?
8. Балаңыз сізге қасқыр мен түлкі туралы ертегі айтып беруін өтінді, сіздің әрекетіңіз
9. Мақалды жалғастыр. Бала жас шыбық... (қалай исең, солай иіледі)
10. Ана бауырындағы бұлақ.... (бала жағасындағы құрақ)
11. Балаңыздың қандай да бір іске өнері, қызығушылығы байқалсы не істер едіңіз?
12. Сіздің балаңыз сізге түн неге қараңғы? Күн қайда кетті ? деген сұрақтар қойса, қалай жауап берер едіңіз
13. Балаңызды еркелеткенде қандай сөздер айтасыз?
14. Балаңыз сізді ренжітті, сіздің іс - әрекетіңіз.
6.Тыныштық сәті: Бейнетаспадан слайд көру
7. «Өтінемін» ойыны. Мен сіздерге бірнеше нұсқаулар айтамын. Сіздер іс – қимылмен көрсетесіздер. Мен «өтінемін» сөзін қосып айтқанда ғана қимылды жасайсыздар. Мысалы: Өтінемін қолымызды көтерейік . Өтінемін билейік. Ал енді бір – бірімізді құшақтайық. Өтінемін бір – біріңізге қарап жымиыңыздар. Ал енді қабағымызды түйеміз
8. Ситуациядан шығу
1. Балаңыз мектептен жылап келді, сыныптастары итеріп жіберіпті. Сіз қайтесіз?
2. Мұғалім сіздің балаңыздың тәртіпсіз және оған сіздің кінәлі екеніңізді айтты. Сіз не дер едіңіз?
3. Балаңыз мектеп табалдырығын аттағанына бір күн болды, мектепке сумкасын қалдырды. Сіз қайтесіз?
Аялы алақанға байланысты мен бір өсиет әңгімеге тоқталғым келеді.
Өсиет әңгіме. Жағдайлы бір отбасы баласын ешкімнен кем өсіргісі келмей барлық жағдайын жасайды. Қазіргі заманның озық технологиясымен жасалынған ойыншықтар, компьютер, тіптен қымбат телефонды да алып береді. Бірақ баласы осының бәріне қанағаттанбай, күнде ата-анасының жұмысқа кетпеуін өтінеді. Ата-анасы жұмысқа бармаса болмайтынын, ақша табатынын баласына түсіндіреді. Ал, баласы осы сәтте ата-анасының күніне қанша ақша табатынын сұрап біледі.
Бала сол күннен бастап ата-анасының өзіне тастап кетіп жүрген ақшасын жұмсамай жинай бастайды. Жинаған ақшасы ата-анасының бір күндік табысына жеткен күні бала ата-анасына өтініш жасайды.
— Әке, ана! Бүгін жұмысқа бармай бір күндеріңізді маған қиыңыздаршы.
Бір күнгі табыстарыңызды мен төлейін депті. (қалай ойлайсыздар бала неге өтінді?) Міне, ата-ананың аялы алақанының әсері балаға күн сәулесімен бірдей, мұны басқа ешбір нәрсе ауыстыру мүмкін емес.
9. «Жүректен-жүрекке»
«Тілек шамын» жағамын. Бұл шамды жаққан себебім әрқашан алдарыңыз осы жарық шырақ секілді ашық, жарық болсын, оттарыңыз сөнбесін деймін. Бір – біріне тілек айту. Құрметті ата – аналар бала тәрбиесі ешқандай үзіліс, демалыс дегенді білмейді. Олай болса отбасында балаға әрдайым жылы сөздер айтып, дұрыс тәрбие беруге атсалысайық.
Жүректен шыққан тілектеріңіз әрдайым жер бетіндегі балаларды қолдап желеп-жебеп жүрсін дегім келеді.
Ризамын әні.