Творческая работа на тему Гурьлер экенми озь тилим…

«ГУРЬЛЕР ЭКЕНМИ ОЗЬ ТИЛИМ…»
Мен де халкънынъ бир векили оларакъ, тилимизнинъ къыйметини осьтюрьмек макъсадымдадыр. Тильнинъ къыйметини ким тюшюре?
«…Гурьлер экенми озь тилим, МЕН къыйметин тюшюрмесем? …» Майе Абдулганиева нынъ шииринден алынгъан сезлерде тиль меселеси ачыкътан-ачыкъ корьсетиле ве тек бизлернен багълы шу меселенинъ чезильмеси.
«Ана тилим- гъурурым!», «Балданда татлы тилимиз!», «Тувгъан тилим эбедий яшайджакъ!» деген сезлерни чокътан - чокъ эшитемиз,язамыз, амма лафларымызда ве ишлеримизде чокъ къулланмаймыз айтсакъта оладжакъ.
Белли ки, тиль адамлар арасындаки мунасебетлерде буюк рольни ойнай. Тиль ярдымынен инсанлар озь фикирлерини, дуйгъуларыны, арзу-истеклерини ифаде эте билелер Эр бир халкънынъ ана тилининде озюне хас инджеликлери бар. Къырымтатар тилинде де бойле вазиет истисна оларакъ дегиль.
Къырымтатар халкъы, тувгъан тильге - Ана тили дей. Бу шунъы ифаде эте ки, тувгъан тиль анадан балагъа ана сютюнен кече ве ашлана. Лякин языкъ ки, къырымтатарлар арасында бойле мисаллер кунь-куньден азлашмакътадыр. Ве халкъымызнынъ энъ буюк фаджиаларындан бири де, тильни гъайып этюв джерьяныдыр. Тилимизнинъ аджыныкълы алыны шундан анъламакъ мумкюн, меселя земаневий къырымтатар балаларнынъ чокъусы «ана», «баба» ерине «мама», «папа», дейлер, къартана-къартбабалардан озь тилимизде лакъырды этмейлер. Языкъ ки, аджайип  ана тилимизни сокъакъларда, тюкянларда, автобусларда, тойларда, концертлерде, мектеплерде эшитмекнинъ аман-аман  имкяны екътыр. Демек бойле алда, къабаат озюмизде. Чюнки бизим агъзымызны къапаткъан екътыр. Эльбетте, тилимизни джанландырувда девлет ярдым этмей. Лякин бойле вазиетте бизге девлет дегиль де, озюмиз озюмизге ярдым этмек керекмиз. Ве бу ишнинъ темели къорантадан башлай. Бизим халкъымыз ичюн Ана  тилимизде лаф этмек агъыр вазифе олмалыдыр. Озь тилимизде лаф эткенде башымызны котерип, гъурурланып лаф этейик, ве чевре-четте олгъан адамларгъа да озь Ана тилимизни севдирейик. Озюмизнинъ дюльбер, зенгин ве ер юзюнде бир дане олгъан къырымтатар тилимизден утанмайыкъ. Келинъиз бирликте Ана тилимизни джанландырайыкъ! Бирликте биз кучмыз!