Сценарий мусульманского праздника весны «Наврез байрам»

Сценарий мусульманского праздника весны
«Наврез байрам»
( Наврез йырнынъ музыкасынен ачыла)
Алып барыджы (Ведущий): Сюзилип кель,Наврез,сен Бизим бу кенъ алемге!
Ачыл, ачыл,Наврез,сен,
Мевзу ол эр къалемге!
Хош сефаа кельдинъиз сайгъылы мусафирлер,азиз балалар, урметли оджалар. Бугунь бизге энъ дюльбер, энъ гузель , севимли баарь байрамы – Наврез кельди!
Эвель заманлардан берли бу байрам шаркъ халкъларында янъы йыл байрамы сайыла. Къырымтатар халкъы да адет узре эр йыл Наврез байрамыны къаршылап алмакъта. Наврез байрамынъыз мубарек олсун.
1-нджи талебе: Хош кельдинъиз бизим байрамгъа.
Азиз мусафирлер,севимли балалар!
Хайырлы олсун Наврезимиз,
Кельген янъы йылынъыз!
2-нджи талебе: Эр ер ешере,этраф денъише,
Хош кельдинъ, Баарь,
Буюр сен бизге.
Къуванчлар кетир
Сен эвимизге.
Баарь:
Севимли балалар, урьметли мусафирлер меним келеяткъанымны къайдан бильдинъиз де, бойле байрам япасынъыз?
Балалар бирер-бирер:
1-нджи: Ириди къарларынъ ешерди чёллер.
2-нджи: Быракъты зынджырынъ, голь олды селлер.
3-нджи: Ешилленди небататлар,озенлер шыр-шыр акъар.
4-нджи: Инсан,айван, къурт-къырмыскъа.
Эр кес ишини бакъар.
5-нджи: Сабанджылар чельде энди, топракъны аль этелер.
6-нджи: Отькюр сесли бульбульчиклер юреклерни делерлер.
Баарь:
Машалла сизлерге!!!
Меним акъкъында гузель , чокъ шейлер биле экенсинъиз.
Мен кельгенимнен табиат тазере,чюнки мевсимлер денъише.
Алып барыджы:
Севимли Баарь, бизим балалар Наврез байрамына шиирлер,йырлар, оюнлар азырладылар.

Баарь:
Мен де шиир, йыр динълемеге ве йырламагъа севем.
(Баарь акъкъында шиирлер окъула).
1-нджи талебе: Наврез кельди дагъларгъа,
Багъчаларгъа, багъларгъа.
Гуль туттырып къолларгъа
Озгъара тарлаларгъа.
2-нджи телебе: Вишне, кираз, алмалар Ап-акъ чечек ачалар,
Берекеттен хабер берип
Къокъуларын сачалар.
3-нджи талебе: Тереклерде къушчыкълар Наврез йырын йырлайлар.
Бахтлы огълан къызчыкълар Джыйынларда ойнайлар.
4-нджи талебе: Наврез кельди,дуямыз,
Къокъусына тоямыз,
Аман олсун дюнъямиз,
Яшасын Ватанымыз!
3 сыныф –«Наврез» йырыны йырлайлар.
2 сыныф – Оюн «Багъчасарай хайтармасы».
Алып барыджы:
Севимли Баарь , эр заман сен озюнънен Наврез байрамыны кетиресинъ. Халкъымыз эвель-эзельден бу байрамны насыл къайд эткенини яхшы биледирсинъ…

Баарь:
Бу байрамны пек чокъ халкълар бинълердже йыллар девамында къайд этип келелер. Чюнки бу – гузель, къуванчлы кунеш байрамыдыр. Бу куньлери гедже ве куньдюз бир ола. Бу куньден башлап кунеш ерни даа зияде ярыкълатып къыздыраджакъ. Онынъ ичюн бунъа баарь, кунеш байрамы – Наврез дерлер. Бу байрамны халкъ шенъ оюн-кулькю, шакъа-йырнен кечире.
Балалар «Сары эчким» шакъа йырыны йырлайлар.
Баарь:
Бизим халкъымыз исе байрамгъа бир афта эвель азырлана. Акъайлар,йигитлер, огъланлар тарла ишлерине алетлерини азырлайлар, чокъракъларны, къуюларны, озенлерни темизлейлер.
Къадынлар,къызлар исе эв джыштыралар, акълайлар, эр ерни темизлейлер.
Байрам арфеси ишлери биткен сонъ къызлар фал бакъалар.
Алып барыджы:
А-на…бизим къызлар да фал бакъалар.
(5-6 къыз, бирисинъ элинде йыбрыкъ, ортагъа чыкъалар. Элинде йыбрыгъы олгъан къыз йыбрыгъыны ортадаки бир курьсю я да кучюк маса устюне къоя).
1-нджи къыз: Ильванларынъызны йыбрыкъ ичине ташланъыз (къызлар кими юзюк кими сыргъа,боюджакъ,билезлик ве башкъа шейлерни йыбрыкъ ичене къоялар).
2-нджи къыз: Мавиле, кичкенемиз сенсинъ,бу йыл не оладжагъыны сен айтаджакъсынъ ( козьлерине явлукъ багълайлар.Мавилечик бардакъ ичинде олгъвн ильванларны къарыштыра ве бирер-бирер чыкъарып айта).
Бу юзюкнинъ саибине бу йыл янъы къокъла багъышладжакълар.(Саиби юзюкни ала)
Бу таракъ саибесининъ сачларыны эр кунь бир огълан бала чекип-чекип агълатаджакъ. Саиби: -Эй,ярамаз,яхшы шей айтсанъ олмаз эдими!
Бу боюнджакъ саибеси бу йыл мектепте пек яхшы окъуйджакъ ве алгъышлар къазанаджакъ.(Бойле этип балаларнынъ яшына коре меракълы,шакъалы истеклер айтып кулюшелер).
3-нджи къыз сонъунда: Айдынъыз,къызлар,энди бир оюн тёшейик! (бир де-бир миллий оюн)
4-нджи къыз оюндан сонъ: Къызлар,бизге байрамлыкъ кобете,эльва, къурабиелер пиширмек керек,унутмадынъызмы? (кетелер)

Баарь:
Наврез байрамында къысчыкълар ве огъланчыкълар эв-эвден юрип байрам хайырлай эдилер.
Алып барыджы:
Балалар,айдынъыз,биз де Озенбаш коюне байрам хайырламагъа барайыкъ.
(3 сыныф талебелери эчки маскаларыны такъалар,къызларда акъбардакълар).
Балалар бир агъыздан: Эзан,Эзан!!
Хайырлы олсун Наврезинъиз,
Кельген янъы йылынъыз.
Фериде: Буюрынъыз мусафирлер.
Къапым ачыкъ,тёрюм бош.
Эвге кельген мусафирге Даим меним хатрим хош!
Келинъиз балалар, буюрынъыз софрагъа…
Эвелина: Сагъ олунъыз.
Айдынъыз,балалар, юкъары мааледе яшагъан Селиме къартанайгъа барып,онъа да байрам хайырлайыкъ!
Балалар бир агъыздан: Эзан,Эзан!!
Хайырлы олсун Наврезинъиз,
Кельген янъы йылынъыз.
Балалардан бири: Наврез кельди,корюнъиз,
Наврез акъкъын беринъиз.
Селиме къартана: Буюрынъыз, мусафирлер Севимли эвлятларым!
Хош кельдинъыз эвиме,
Джаным сизге севине!
Балалардан бири: Биз ойле бир балалармыз,
Эм ойнаймыз,
Эм, йырлаймыз,
Шенъликсиз байрам кечмез,
Оюн-кулькю ич битмез.
Алып барыджы:
Энди невбет йыр ве оюнгъа.Буюрыныз!
Баарь:
Иште,бизим аджайип халкъымыз бу гузель Къырымда эвель-эзельден бойле шакаларнен байрпмларны шенъ кечирген,къыскъасы,татлы-муабет омюр сюрген.
Алып барыджы:
Сайгъылы балалар, ана-бабалар,урьметли мусафирлер, оджалар. Байрам концертимиз сонъуна кельди. Дикъкъатынъыз ичюн, къол туткъанынъыз ичюн чокъ сагъ олунъыз.
Халкъымызда бир де бир той – дюгюнни,байрамны хораннен екюнлемек адетолгъан Айдынъвз,биз де бир хоран тёпейик!